Sóknir og kirkjur

Kaþólska kirkjan á Íslandi er eitt biskupsdæmi sem skiptist í eftirfarandi sóknir:

Krists konungs sókn Til sóknarinnar heyra Seltjarnarnes og Reykjavík að Elliðaám. Biskupssetur er í Landakoti, Reykjavík og biskupskirkjan er Dómkirkja Krists Konungs í Landakoti. Þessi kirkja er einnig ‘Basilíka’ eða höfuðkirkja, sú eina á Norðurlöndum.

Sókn hl. Frans frá Assisi Undir hana heyrir Vesturland. Hún var stofnuð 1. september 2018. Sóknarkirkja er í Stykkishólmi „Kapella Maríu meyjar, hinnar ævarandi hjálpar.“

Sókn hl. Jóhannesar postula Undir hana heyra Vestfirðir. Sóknarkirkja er St. Jóhannesarkirkja á Ísafirði. Sóknin var stofnuð árið 2016 en fyrsta kaþólska kapellan á Ísafirði var tekin í notkun árið 1989. Sóknin er undir vernd hl. Jóhannesar postula og guðspjallamanns.

St. Jósefssókn Undir sóknina heyra Hafnarfjörður og Garðabær. Sóknarkirkjan er St. Jósefskirkja á Jófríðarstöðum. Sóknin var stofnuð árið 1926. Maríusystur aðstoða prestana við safnaðarstörf, einkum við barnakennslu. Þær búa á Jófríðarstöðum í eigin húsnæði og er kapella á heimili þeirra. Í sókninni er einnig klaustur á Jófríðarstaðahæðinni. Þar búa pólskar karmelnunnur, sem helga sig bænalífi.

St. Maríusókn Undir sóknina heyra Reykjavík austur frá Elliðaám, Kópavogur, Mosfellsbær og Suðurland að mörkum Vestur- og Austur-Skaftafellssýsla. Sóknarkirkjan er Maríukirkja í Breiðholti. Sóknin var stofnuð árið 1985. Reglulegar messur eru á Selfossi og í öðrum sveitarfélögum.

St. Péturssókn Undir hana heyrir Norðurland. Sóknarkirkjan er St. Péturskirkja á Akureyri. Péturssókn var stofnuð 1953 og var þá svokölluð hálf-sókn til ársins 2000 þegar hún varð fullgild sókn. Auk daglegra messa á Akureyri í sóknarkirkjunni og í kapellu karmelssystra er messað víða um Norðurland. Á Akureyri búa karmelsystur, sem aðstoða við safnaðarstörf og annast barnagæslu. Á heimili þeirra er kapella og einnig á nýreistu heimili systranna á Dalvík.

St. Þorlákssókn Undir hana heyrir Austurland. Sóknarkirkjan er St. Þorlákskirkja á Kollaleiru. Sóknin var stofnuð árið 2007. Á Kollaleiru er hettumunkaklaustur. Þar búa hettumunkar frá Slóvakíu. Kapella er einnig á Egilsstöðum. Hún var blessuð árið 2009 og nefnist „Corpus Christi” kapella. Kaþólsk kapella í Höfn í Hornafirði var vígð árið 2013 og helguð heilagri fjölskyldu og hl. Jóhannes-María Vianney. Messur eru haldnar reglulega víða um Austurlandi.

Sókn heilags Jóhannesar Páls II Undir hana heyra Suðurnes. Sóknarkirkja er kirkja heilags Jóhannesar Páls II á Ásbrú í Reykjanesbæ. Sóknin var stofnuð árið 2014. Sóknin er undir vernd heilags Jóhannesar Páls páfa II sem var tekinn í tölu dýrlinga þann 27. apríl 2014 en hann sté fæti á sínum tíma í Keflavík, sem tilheyrir sókninni, og kyssti íslenska jörð þegar hann heimsótti landið árið 1989.